Ukwezi kw’Ibikorwa by’Urubyiruko rw’Abakorerabushake 2026: Urubyiruko ku Isonga mu Iterambere ry’Umuturage

Rwanda Youth Volunteers in Community Policing (RYVCP) ku bufatanye na MINALOC, MOYA, Polisi y’u Rwanda (RNP) n’izindi nzego zifatanyabikorwa, yatangaje gahunda y’Ukwezi kw’Ibikorwa by’Urubyiruko rw’Abakorerabushake 2026. Iki gikorwa kizaba kuva tariki ya 1 kugeza ku ya 31 Ukwakira 2026 mu turere twose tw’u Rwanda, kigamije gukomeza kwimakaza umuco w’ubukorerabushake no guteza imbere imibereho myiza y’umuturage.

Insanganyamatsiko ya 2026

“Urubyiruko rw’Abakorerabushake ku Isonga mu Iterambere ry’Umuturage.”

Insanganyamatsiko y’uyu mwaka ishimangira ko urubyiruko ari imbaraga zubaka igihugu binyuze mu bikorwa bifasha abaturage, gushimangira umutekano no guteza imbere iterambere rirambye.

Intego z’Ukwezi kw’Ibikorwa

Ukwezi kwahariwe ibikorwa by’urubyiruko rw’abakorerabushake kuzibanda ku ntego zikurikira:

• Kwimakaza umuco w’ubukorerabushake mu rubyiruko.

• Gushimangira uruhare rw’urubyiruko mu iterambere ry’igihugu.

• Gukemura ibibazo bibangamiye imibereho myiza y’abaturage.

• Kongera ubufatanye hagati y’inzego za Leta n’abafatanyabikorwa.

• Kwifatanya n’Isi kwizihiza International Volunteer Year 2026.

Ibikorwa Bizakorwa Mu Rwanda Hose

Mu minsi 31 y’uku kwezi, ibikorwa bizibanda ku bukangurambaga ndetse n’imirimo y’amaboko ifasha abaturage.

1. Ubukangurambaga (1–15 Ukwakira 2026)

Hazakorwa ubukangurambaga bugamije:

• Kurwanya ibiyobyabwenge n’inzoga zitujuje ubuziranenge.

• Kurwanya ibyaha no kwimakaza umutekano.

• Gusubiza abana mu ishuri.

• Kurwanya ihohoterwa rishingiye ku gitsina n’inda ziterwa abangavu.

• Kwigisha urubyiruko gukoresha neza imbuga nkoranyambaga.

• Gusigasira indangagaciro na kirazira by’umuco Nyarwanda.

2. Ibikorwa by’Iterambere (16–31 Ukwakira 2026)

Mu gice cya kabiri cy’ukwezi, urubyiruko ruzitabira ibikorwa birimo:

• Kubakira no gusana amacumbi y’abatishoboye.

• Kubaka no gusana ubwiherero.

• Kubaka imirima y’igikoni mu kurwanya imirire mibi.

• Gutera ibiti bivangwa n’imyaka n’ibitavangwa n’imyaka.

• Gucukura no gusana imirwanyasuri.

• Gufasha imiryango itishoboye binyuze mu bikorwa by’ubufatanye.

Ingengabihe y’Ukwezi kw’Ibikorwa

Ibikorwa byose bizakorerwa mu turere twose tw’u Rwanda ku bufatanye n’inzego z’ibanze, MINALOC, RNP, MOYA, MINEMA, MINISANTE, RDF, NYC na PSF.

Ibyitezwe Kugerwaho

Biteganyijwe ko uku kwezi kuzagira uruhare mu:

• Kuzamura imyumvire ku muco w’ubukorerabushake.

• Gukemura ibibazo bibangamiye imibereho y’abaturage.

• Kongera ubufatanye hagati y’urubyiruko n’inzego zitandukanye.

• Guteza imbere umuco wo kwigira no kwishakamo ibisubizo.

  INYANDIKO NSOBANURAMPAMVU KU KWEZI KWAHARIWE IBIKORWA BY’URUBYIRUKO RW’ABAKORERABUSHAKE.

Ubutumwa ku Rubyiruko

Urubyiruko rwose rurasabwa kwitabira Ukwezi kw’Ibikorwa by’Urubyiruko rw’Abakorerabushake 2026 no kugira uruhare rugaragara mu kubaka umuturage, umuryango n’Igihugu binyuze mu bukorerabushake.